11 月 12, 2019
Breaking News

Sign in

Sign up

  • Home
  • 旅行
  • 香港
  • 【放假去邊好】元朗隱世野餐地點 448 農莊!獨特巴士 cafe 嘆熱咖啡

【放假去邊好】元朗隱世野餐地點 448 農莊!獨特巴士 cafe 嘆熱咖啡

By AK仔 on 5 月 4, 2017
0 244 Views

放假有女朋友陪,無錯係好,但係有時一諗到「去邊玩」呢個極高深嘅問題,其實堅頭痕。無辦法,香港地太細,好多地方都好似去過哂,要搵一個有新鮮感的地方,係難的。不過,最近網上見到有網站介紹一個隱世旅遊地點 – 448 農莊,睇相望落好似幾靚咁,於是乎就抱着好奇的心態,同女朋友去一探究竟!到底 448 農莊值唔值得去呢?就等 AK 仔同大家分享下啦!
地點:新界元朗欖口村欖堤東路
前往方法:好老實,交通就唔係好方便,無一架巴士 / 小巴,係可以直接到達 448 農莊,所以有車就最好自駕遊,好似 AK 仔無車嘅,最快捷最方便的方法,就係的士。在朗屏站 B2 出口出去,沿着元朗劇院方向走,一直走到元朗體育路,截的士,大約 10 分鐘左右就到,AK 仔果程用了大約 $38
入場費用:唔好以為免費,入一入個場,承惠 $50 / 人。不過要注意的是,在出發之前最好先 whatsapp 66841448 預約。
開放時間:星期一至日 09:00 – 17:30
備註:多蚊,記得自備防蚊用品!

▲ 要先打電話 / whatsapp 預約,每人 $50 入場。


講完 448 農莊點去、幾錢入場等基本資訊,相信大家最最最想知道嘅係,到底值唔值得特登山長水遠去元朗搭的士再俾 $50 入場呢?AK 仔嘅 comment 係:「一去無妨,唔去都無損失。」448 農莊最大的問題,就是雖然佔地面積有 10 萬呎之大,但實際上可以睇嘅嘢唔多。反而如果你有小朋友,帶佢嚟玩就可能比較適合,農莊內除左有野餐區,亦都有射擊區、小型賽車區等等,小朋友喺呢度應該都會玩得幾開心!
小動物種類不多,但勝在有得餵羊咩咩!
剛才提到,農莊內可以睇嘅嘢並不多,就以「小動物區」為例,唔好以為去到農莊就一定可以見到好多小動物,基本上在「小動物區」可以睇到的動物種類,5 隻手指數得哂,得幾隻雀、幾隻鸚鵡以及幾隻白兔仔,無了,一分鐘,唔係,10 秒鐘已經夠你睇哂。不過,再行入一點會見到有好多羊咩咩,咁啱撞正食飯時間,負責人會派一些麵包給訪客自行餵飼啲羊咩咩,呢個 moment,相信會是我在 448 農莊裡最開心的環節。另外,如果你係比較鍾意拍攝的,農莊內除了有好多花草,仲有一些卡通人物的佈置可以影相,例如「七個小矮人」等等。
sdr

▲ 一入到農莊,映入眼簾的是一片花海。


dav

▲ 小動物種類並不多,係得 AK 仔背後的幾隻雀,以及鸚鵡同白兔仔。


▲ 好在再入啲見到有好多羊咩咩,有職員會派麵包俾遊客餵佢哋。聽職員講,啲羊咩咩食嘢好挑剔架,一定要曬乾左嘅麵包,佢哋先會肯食。真係識食~



448 農莊必試!巴士上 cafe 嘆香噴噴熱咖啡
行到攰,想搵地方休息下,你可以去野餐區,有一片小型草地,有帶帳篷的話,紮埋營都仲得,呢個 448 農莊,都可以稱得上係一個「隱世」野餐好去處。不過無帶帳篷,又嫌太多蚊,可以行番去入口附近,會見到有架紅色的巴士。唔好以為,架紅色巴士只係俾遊客影相用,其實唔係,佢係一間 cafe,上層有枱有椅可以俾你坐低休息,而且下層亦可以買咖啡飲。
不過,AK 仔去果陣,暫時只有兩款口味的咖啡,一款是「特製手調咖啡」,賣 $25,而另一款是「靈芝咖啡」,賣 $15。而 AK 仔因為飲唔慣咖啡果種苦味,所以就揀左「靈芝咖啡」,飲落口係唔會飲得出靈芝味 (因為靈芝正常都係無乜味的),不過相當香醇可口,相比平時 AK 仔飲的三合一咖啡更好飲。呀!值得一提的是,暫時只有熱咖啡供應,老闆娘話過多一排就會有凍咖啡架喇!
sdr

▲ 外型真係成架巴士咁,唔講唔知原來真係 cafe,有咖啡賣的!


dav

▲ 上層的環境係咁的,有枱又有椅,坐下休息下嘆杯咖啡,真係非一般享受。


cof

▲ 買咖啡仲會送多塊餅,total 承惠 $15!


小結
今次係 AK 仔第一次嚟到元朗 448 農莊,其實環境係幾優美嘅,但交通並不方便,而且感覺上係比較適合一家大細嚟遊玩,或者特意過嚟野餐嘅朋友多啲。如果好似 AK 仔今次同女朋友一齊嚟,除左自拍呃下 like 之外,其實係會有少少悶,最開心就係有得餵羊咩咩。不過如果真係嚟到 448 農莊,就真係要試下感受下巴士上的 cafe,確實係別有一番滋味。如果平時諗唔到有咩節目,你又會唔會考慮過嚟打下卡參觀下呢?
支持請讚好 Facebook 專頁: AK 有話兒

Leave a comment

發佈留言必須填寫的電子郵件地址不會公開。 必填欄位標示為 *