11 月 12, 2019
Breaking News

Sign in

Sign up

  • Home
  • 科技
  • 【關公災難】 某米香港七宗罪,惹媒體暴怒

【關公災難】 某米香港七宗罪,惹媒體暴怒

By AK仔 on 6 月 3, 2018
0 71 Views

一直以來,AK仔對某米品牌,雖然談不上是好感,但未至於是反感。然而,最近的深圳發佈會, 儘管不是上京赴會,但其旅程相比煉獄更可怕。一切的辛酸,全因某米香港引發的關公災難造成,實在太經典,罕見地一炮過得罪大部份媒體,忍不住要起文數算某米香港的七宗罪。
關公(Facebook)
1. 下午 2 時發佈會,居然約 8:45 九龍塘集合,先至一齊去深圳。(其實呢個好小事,睇埋落去你就知點解有「罪」)
2. 當日 AK 仔要特登 5:45 起身,趕去九龍塘集合,然後去到深圳,成村人一齊搭車去酒店。去酒店做咩?係咪上房擺低行李先?錯哂!去酒店只是為了遊車河,飲杯咖啡又搭成粒鐘車去發佈會會場,咁特登咁早出發去酒店的意義是甚麼?有誰可以告訴我?
3. 無準備 Welcome Lunch,都算,水又無枝,午餐係咩?咪每人派件三文治,咪當午餐囉。一件三文治,要媒體頂到夜晚六點幾,仲要肉都無,媒體唔係神仙,都係要食嘢架。仲要呀,有部份三文治係跌過落地架,有相為證,雖然公關同我哋講,我哋果啲三文治一早拎咗上車,但就算啲三文治唔係食落我哋肚,但都代表住有其他媒體要食呢啲跌過落地嘅三文治啦!
[投訴完一輪,公關先識一人買枝水,同埋出去買啲嘢食俾我哋,買啲咩?咪麥當勞每人一個包囉。Err,有好過無咁囉,叫做醫下肚餓。]

4. 呢點唔關公關事,係某米一向以來自以為聰明的政策。發佈會完,去媒體體驗區,明知自己出咁多產品,但又限媒體 10 分鐘時間影機。大佬,我哋影得機嚟就趕我哋走,仲點體驗呢?不嬲去發佈會都係一樣,媒體要影機,就要發佈會未完已經快快趣去排定隊架啦,遲黎就自己慢慢等,好合理,何必做到要趕人走咁呢?
[連一向脾氣好的 AK 仔,都忍唔住鬧:請得我哋黎,又唔俾時間我哋體驗,咁係唔係即係叫我哋唔使幫你寫文?係咁嘅態度架咩?]
5. 完咗發佈會,個個出哂嚟,又唔安排架車去會場門口等,三十幾度嘅天氣,個個就喺度暴曬。想上車?又要行成半個鐘先上到架車,咁做乜唔直接叫架車去會場門口接我哋呢?
6. 明明有個某米媒體 WhatsApp 群組,但神奇地公關是經常性唔覆機,無人駕駛咁,咁到底開個群組的意義何在呢?
7. 公關口頭襌般口講唔好意思,多次話自己「自隊三杯」,但從來不找數,我哋計過,前後已經九杯了,睇下下次佢仲會唔會找數。
好老實,AK 仔從來不會覺得媒體是上帝,是皇帝,但只求得到應有的尊重。媒體同公關之間是互相影響的,得罪了公關,都會有麻煩。問題係,既然某米請得媒體去參加發佈會,就唔應該乜到度縮數,有錢上市,無錢俾媒體食餐好飯。這反映某公司的誠意有幾多,還是媒體就是垃圾,所以要被安排垃圾級的待遇呢?當天發佈會,搞到好多媒體都出現中暑症狀,AK 仔亦曬到頭痛,甚至當晚仲嘔埋出黎。對於今次某米公關的安排,實在教媒體們非常失望。
聲明:此文與公司立場無關,純粹個人宣洩。寫個人 blog 啫,犯法呀?

Leave a comment

發佈留言必須填寫的電子郵件地址不會公開。 必填欄位標示為 *