11 月 12, 2019
Breaking News

Sign in

Sign up

  • Home
  • 電影
  • 與鱷魚進行 7 日困獸鬥!電影《鱷口逃生 The Pool》影評:精彩、無悶場,但太多不合理位

與鱷魚進行 7 日困獸鬥!電影《鱷口逃生 The Pool》影評:精彩、無悶場,但太多不合理位

By AK仔 on 1 月 20, 2019
0 729 Views

好耐都無入戲院睇過戲,難得未婚妻主動話有戲想睇,咁 AK 仔都要配合一下,就趁住星期六早收工,去睇戲。今次睇嘅電影係叫《鱷口逃生》,一睇個名就估到係同鱷魚有關,而喺呢篇文章入面 AK仔就唔劇透咁多,簡單概括一下就算:

簡單嚟講,呢套《鱷口逃生》係講述男女主角被困於 6 米高、荒廢的泳池入面(已放水),同一條鱷魚困獸鬥 7 日的過程,而至於點解無端端男女主角會被困 6 米高的泳池內呢?而點解無端端會有條鱷魚出現喺泳池度呢?呢啲大家自己去戲院睇啦,唔講咁 details。

而睇完呢套電影,AK 仔作出了以下結論:
001:男主角一定係「地獄黑仔王」
無錯!每次好似見到有逃生的希望,但最後男主角都走唔甩,甚至仲搞到自己傷痕累累。就好似每次有人經過泳池,男主角唔係畀嘢卡住水底 (一開始放緊水但未放哂),就係爬左入渠道叫唔到人,命運總是同佢作對咁。
002:主角光環超強!男女主角都有不死身
雖然主角係好黑仔,但與此同時佢又好似不死小強,仲要開左外掛有無限體力咁,就算男主角流左好多血咁多日無食嘢,但依然可以有力同隻鱷魚拼鬥。而女主角一開始撞穿頭同樣失血過多,但後來都好似好有精神般,實在驚嘆佢生命力可以有幾強。


003:男主角參加舉重世界賽,應該都可以佔一席位
唔係講笑,有一幕係咁,男女主角都暈咗,隻鱷魚準備想食女主角,但呢個時候男主角突然醒返,一發現即刻衝過去捉住鱷魚尾巴,成條鱷魚被男主角扔飛。條鱷魚看上去都唔係好細條,都有啲份量,上網查過䧳性鱷魚的重量都有二三百公斤,再查過舉重世界紀錄 105 公斤以上級,抓舉同挺舉記錄分別為 220 公斤同 263 公斤,而男主角可以輕鬆將整條鱷魚扔飛,可見他的力量分分鐘同世界冠軍有得揮。
看後感
《鱷口逃生》呢套電影在某程度上同一般的泰國片一樣,都係驚險中帶有一點無厘頭,而且最後點都係大團圓結局,但整體嚟講又唔會有悶場位,成套戲都令人緊張到透不過氣。
不過,呢套戲都有唔少穿崩位/不合理的地方,例如一個人咁多日無食嘢 + 流咁多血,點解都唔會失血過多而最後仲殺得死條鱷魚?另外一開始女主角撞穿頭,男主角用膠紙包住女主角個頭,點解第二日就連膠紙都唔見咗?有無搣得咁容易又唔會整傷傷口?第三,睇完戲都聽到有人討論,點解明明男主角隻手應該流好多血受咗好多傷,但去到隻手好似咁乾淨無事咁嘅?呢啲位到底係導演的疏忽,抑或有心畀位人入,引發多點討論空間?
AK仔評分:8/10

支持請讚好 Facebook 專頁: AK 有話兒
Leave a comment

發佈留言必須填寫的電子郵件地址不會公開。 必填欄位標示為 *