11 月 12, 2019
Breaking News

Sign in

Sign up

我們結婚了!BIG Day 當日精華回顧

By AK仔 on 6 月 9, 2019
0 423 Views

收到很多朋友嘅反應:「AK 仔,你個婚禮搞到好好,好成功喎!」、「安排得唔錯,啲嘢食幾好味」、「司儀好好,全程無悶場」…… 收到呢啲回應,我只能說一聲:託賴!好好彩,最後所有事都順利進行,雖然中途有啲大頭蝦位,但總算係,我終於結婚喇!
FB
2019 年 5 月 18 日,星期六,AK 仔終於都同心愛嘅「她」正式結成夫婦,踏入人生新階段。
記得前一晚,AK 仔相當緊張,上完頭,忙完一大輪之後,接到一位朋友電話,傾咗差不多個幾鐘,之後就一夜無眠,一直去到朝早 5 時多,就要起床,準備出發跟兄弟們會合,去接新娘。
老婆訂了紅磡嘉里酒店嘅行政套房,作出門用途(咁啱佢訂婚紗果間舖個老闆娘,又係同一日結婚、同一日出門,又咁啱出門果陣又撞到佢,係有緣嘅~),而我就同兄弟們約咗 7:30 紅磡站集合,搭的士過去酒店樓下等待,等待整理裝束,等待化妝 set 頭。
而在接新娘之前,攝影師會先同 AK 仔以及兄弟們影咗一堆花絮先,相片預計要等 3 個月後先到手,不過事後問咗攝影師哥哥,可唔可以畀住幾張我哋「解下渴」先,所以姑且就分享住以下幾張先:
攝影團隊:Zeroplus Photography


到接新娘環節,玩咗唔少遊戲,包括要着草裙、Bra,踩石春路同埋跳舞,另外又放舊蘋果入去絲襪裡面,綁在身上,唔用手想辦法將地上大約十枝水撞翻。有關片段,因為未收到相,遲下先再分享~
玩完遊戲,就來到接新娘一個最重要環節,就係宣讀愛的宣言。事實上,原本老婆已經淘寶買咗個「愛的宣言」牌,不過之前同攝影師開會果陣,攝影師哥哥已經講定,我需要另外準備多一份屬於自己嘅愛的宣言,對於不擅於講嘢嘅 AK 仔,真係好有挑戰性,好在攝影師表示,可以打喺手機讀出嚟,咁都仲好啲,幾驚要就咁爆肚 🤣
(想知我愛的宣言講咗乜?留言我就話你知!)
玩完遊戲,見到新娘,之後發生嘅事都係千篇一律:敬茶、出門回男家、拜神、又敬茶、一班人飲茶……
飲完茶之後,我哋同兄弟姊妹團就一齊去大埔海濱公園外影,幸運地,香港天文台的天氣預測太唔準,原本以為真係會有雷雨,最後無事發生,令整個外影過程相當順利,確係天佑我也。同樣地,外影相未到,得幾張相可以先睹為快,去相!

外影完之後,我們就立即坐 28 座旅遊巴到紅磡彩福酒樓,然後大家就開始各自各的工作,兄弟姐妹有他們的佈置,我們有我們不斷地換衫,證婚,迎賓等等。中間出現了點小插曲,嚇到 AK 仔擔心到不得了:在證婚之前 15 分鐘,先發現銀包唔見咗,銀包唔見事小,身份證唔見事大呀!無身份證,點簽紙!? 好在後來問咗律師,因為我哋之前已經親身上過律師樓交過正本資料,所以就算無身份證在身,都可以簽到紙,咁我先至鬆一口氣~(後來發現原來是入門換衫時漏低咗喺屋企……)
在證婚的過程中,外父大人拖着我老婆,將佢交到我手中,然後我們在台上宣誓:「我請在場各人見證,我 XXX ………………」,見到老婆邊讀邊喊,AK 仔都有少少想喊的衝動~
證婚完,又係換衫,迎賓,同賓客寒喧幾句,轉眼就到了 8 點。果陣酒樓經理仲同 AK 仔核對緊人數,表示有些枱得 7 個到咗 (因為有些人遲到~),有些枱多人得滯唔夠位,AK 仔要馬上處理這種情況,幸好最後都無事,張張枱都坐得 full,多謝各位賞臉。
接着下來的情節,相信大家都相當熟悉:March in 進場、致謝辭、睇成長片段、開飯、睇早拍晚播、敬酒等等,而我們就加入了一個環節,就係送康乃馨給雙方父母。點解唔係送玫瑰呢?事實上,AK 仔準備了特別驚喜,送畀老婆,就係一大束玫瑰花,見到老婆驚喜得哭泣流涕,AK 仔都感到有點滿足 (好似好變態咁 XD)
總括來說,其實搞一個婚禮,就好似做一個好大嘅 project,呢段時間辛苦老婆大人,因為 AK 仔工作時間頗長,平時參與的時間並不是太多,我就好比一個讀書時期的 freerider 一樣。好在,老婆大人都諒解我,沒有太大的責怪,咁都好啲!最後,成個婚禮搞得成長,無乜悶場,唔少得嘅係多謝 MC Tim Lau,無佢咁識帶動氣氛,相信成個婚禮唔會咁輕鬆順利 (後來先知原來佢曾經參與過《玩野王》玩阿 Bob 架!而且原來剛巧佢係我小學師兄添!真係有緣!)。
又再一次最後:多謝當日所有有份參與的你們!

立即支持並讚好Facebook 專頁
No Comment Yet
Leave a comment

發佈留言必須填寫的電子郵件地址不會公開。 必填欄位標示為 *

%d 位部落客按了讚: